بين موجة ومحيط.. نداء

فتّحت على أصوات كتير حواليا, أصوات بدأت افسرها وأميز منها اللي يطمئن من أصوات الخطر, شيء جوايا كان بيزقني استخبى أحيانا وأوقات يخليني أعوم أقرب لأصوات تانية, يدلني إن الدفا عندهم وأطمئن فيهم من أصوات تانية مرعبة, في أصوات كتير معرفتش افسر شعوري تجاهها هيبعدني استخبى ولا هيزقني أقرب. ف كتير كنت بقف مكاني أحاول أسمع كويس, احس وأفهم قبل ما اتحرك

الموجة جوة المحيط قادرة تنقلك من عالم للتاني في لحظة, من مكان آمن وسط عشب ومخلوقات و في لحظة تنقلك جوة قلب حوت أكبر من قلب المحيط .

معرفتش الفرق بين الظلمة والنور غير لما البراح ضاق, ما قدرتش استحمل ظلمة المحيط ولقيتني بزق روحي لفوق, لبعيد عن ما أعرف لحد ما عيني شافت زرقة تانية وبحر تاني .

ومن فوق شفت حيتان وأسماك كتير سوا سبقوني وعرفوا لعبة النط ف الهوا,

والخروج من الظلمة لقلب نور منعرفوش

سمعت أصواتهم وحكايتهم عن النور والشمس والجزر الدافية والشطوط

سمعت وصفهم لأشكال الصدف ولأغاني القواقع ع البر لما يمر الهوا من جواهم كأنه كأنه بينده عصفور ف الفضا

سمعت نقطتين ف مية بيحكوا عن خطر النزول ف الغريق وعن شيء مكتوب منعرفوش

سمعت صوت أزازة فيها شيء مستخبي وموج البحر بيمرجها بين صخور على جزيرة

سمعت صوت مخلوق جميل بيغني للبحر البعيد عن النور الأصفر

سمعت خربشة رجلين الكابوريا ع الصخور وسمعت دحرجة الزلط الصغير وصوت ضحكه قبل وقوعه في قلب المحيط

سمعت السمك بينط من قلب المحيط للسما

وسمعت طيور بتنط من السما لقلب المحيط

سمعت كل الخلق اللي عدوا من هنا في النور وفي قلب الظلمة

شفتهم بس محدش شافني

ولا شاف لون المية وهي بتتحول بلوني لما احكي اللي بشوفه لظلمة المحيط

كنت فاكر اني علشان حوت صغير محدش هيسمعه وسط كل دوشة المحيط والخلق .

ففضلت احاول اتعلم الحروف والكلام, الحكايات والأغاني وصوت الموج وزأزأة الطيور ونور الشمس وصوت السحاب لما يعدي وأصوات المراكب والدوامات حتى أصوات الغرقى حفظتهم ومعرفتش انجدهم ..

حفظت كل الأصوات لكن صوتي مسمعتوش, كبرت و بقالي مساحة أكبر في المحيط

لما كنت بقرب للحيتان وهم لسة بيندهم على بعض علشان يختاروا طريقهم واغنيتهم كل موسم, كنت بقرب ويقربوا لكن فلحظة بلاقيهم ف البعيد, متبحترين أو كل حبة منهم في سكة او كلهم سوا و أنا اللي بعيد

لما كنت بقرب لأسراب السمك كانوا بيخافوا مهما حاولت احكيلهم إني بس محتاج صحبة ف السكة ما كانواش بيسمعوا

بس يسمعوا إيه ؟ صوتي اللي معرفش صوته ؟ صوتي اللي تايه ف المحيط ملقيتهوش

لا بين الصخور ولا وسط الشعب ولا في قلب دولفين وحيد ولا مستخبي في لؤلؤة أو صدفة ولا طار مع ريش عصفور, صوتي ماتولدش لما اتولدت ف المحيط

او يمكن عرف يطير و استخبى في حنجره هدهد

او سبقته ومعلمتهوش العوم معايا

كتر الاسئلة والدعبسة عن صحبة حيتان او سمك او عن صوتي زودت دوشة أصوات المحيط في وداني و ضلمة الغويط في عيوني

مابقتش عارف بتحرك فين وإزاي كنت بتحرك في كل مكان و كل حتة بقرب من أسراب السمك والطيور زي المجنون الهايم فكانوا بيخافوا كنت بنده بعلو صوتي, بعلو ما أقدر, بعلو ما أتمنى سرب يسمعني, ان قوقع ينده عليا م الهوا زي ما بسمعه

لكن مفيش صوت واحد ينده يبل الريق !

تعبت, زعانفي باشوا ما بقتش قادر حتى أعوم, نسيت كنت بعوم بالسرعة دي ليه ؟!

بطلت, تقل جسمي و بقى ينزل لوحده لقلب المحيط , هناك الظلام اظلم من قلب حوت فاضي ممكن يبلعك

زعانفي لوحدهم بشويش كانوا بيحاولوا يوصلوا روحي تسمع أصوات السما, لكن تقل الظلمة جوا روحي كانت بتنزلني اعمق

لحد ما زعانفي ما بقتش تقدر تزق روحي او تنفض عنها صدأ ظلمة المحيط

فضلت الموجة تزقني شوية, حسيت ان الموج سمعني, ان الموج لقى صوتي هناك وبيجيبهولي يخبط الموج فيا بشويش فأحس ب فرافيت صوت جوا روحي بتتحرك, بتعلى,و تقوم واحدة واحدة لحد ما حسيت اني رجعت اسمع زي الأول, عيني قادرة تشوف النور وزعانفي رجعت تحاول

لما طلعت كان صوت انين صدأ روحي أعلى من كل دوشة المحيط

سمعت جزيرة عليها اصوات كتير و شفت خلق ودانها مبحلقه بتسمع

فضلت احاول اقاوح الظلمة والمحيط وانط وانده عليهم يمكن يسمعوا حتى لو مخلوقات متشبهنيش, لو مخلوقات متعرفش أصوات المحيط بس يمكن يكونوا سمعوا صوتي

او لاقوه في أي بحر أو سما تانية يدلوني عليه

فلحظة وانا بنده عليهم سألت نفسي انا كنت عايز صوتي اعمل بيه ايه ؟!!!ا

فنزلت في قلب المحيط

...

النداء : https://www.youtube.com/watch?v=6ydSYQ4I4Q0

عن الحوت : https://www.youtube.com/watch?v=XFFgoFSOG1Y&t=105s