الشمس والبيوت

الأرض كانت خلاء

مفيهاش غير حبات الرمل بيلعب مع الشمس, لعبة النور وانعكاسه ع السما, يوصل ويبعتسلامات من الاحياء في الارض للاحياء في السما

الكون براح ونور

بس قوة نور الشمس رغم كل محبتها للأرض كانت مؤلمة ع المخلوقات فبدأ النخل يطرح ويفرد في الارض جدور لجل ما يضلل ع المخلوقات حبة من بين الشمس

نخلة واحدة من بين كل النخلات قدرت تكبر وتعلى وتكون واضحة وسط الصحراء للخلق لما يطلوا من بعيد يتنجدوا بظلها ويرتاحوا في راحتها, واحيانا كانت بتهادي لمن تحب فرع من فروعها يغزل بيه ظل يحمي عقله من الشمس في السكة الطويلة لجل الوصول

الارض كانت براح ,خلاء, نور وونس في الليل بهلال القمر لما يهل من بعد غياب طويل على الصحراء

لكن مش طويل عليه لانه دايما شايف من مكانه و مش متشاف

وسط البراح كانت المحبة هايمة بين السما والرمل والسحاب والنخل والبيوت الصغيرة اللي بدأت تتبنى بايادي الزوار اللي مروا من هنا في سكتهم ومقدروش يكملوا فقعدوا,

او الزوار اللي الارض هنا سحرتهم بعد ما لفوا وتاهوا في سكتهم كتير رجعوا بعد توهة للأرض دي مشتاقين اكتر وعارفين معنى جمال البراح

واحدة واحدة الأرض مابقتش خلاء ولا طل بدأ الونس يملا الجمال بجمال جديد

ونخلات اتزرعوا بأيادي صغيرين طرحوا ثمر بكل الوان الشمس عند المغيب

النخل عرف محبته للشمس والنور اكتر وهو فوق

البيوت كانت محبة ,النخل طرح محبة ,الشمس بتنور كل يوم محبة

البراح واسع وساع كتير من الحبايب والتايهين والهايمين والواصلين لمستقر ارواحهم

بس الخوف ما بيخليش, بيطل كل ليلة في قلوب كل الخلوقات يظلمها

لكن الشمس كانت اقوى ونورها كل صبح كان بيطمئنهم ان الارض دي آمان وارضهم

لكن البراح بكل جماله كان فيه من اللي يخوف كتير

الريح اللي كانت بتطل من وقت للتاني تقدر تغير معالم الارض بالكامل تقدر تتوه الخلق وتبعتر النور وتملا القلوب خلاء

بيوت كتير كانت بتتوه وترجع تلملم روحها تاني

بيوت كتير كانت بتتبعتر في الطرق مع حبات الرمل

بيوت كانت الونس صبحت بيوت مهجورة

صبحت بيوت مخيفة ما ضاعتش ولا تاهت وبقيت في ارضها لكن ضاع منها الونس والمحبة

الشمس دايما شايفة الحكاية من الأول

والارض دي من اول حبة رمل وحيدة ف الطل لحبات الخوف الكتير في قلوب البيوت المهجورين

الخوف والشمس والنور والظل محدش منهم قادر يغلب الباقي ويبقى هو, ولا حد قادر ينسحب من الحكاية او حتى حد منهم يغير دوره ويكتب دور جديدة عن نفسه

لا الشمس نورها قادر يزيل الخوف ولا الخوف قابل نفسه ووجوده ,وعارف ان وجود الشمس اجمل بكتير من انه يغلب ويفضل الكون بضلمته

فضلوا كل حد في مكانه يسأل لو الادوار ممكن تتبدل؟ او حد منهم يختفي يمكن الحكاية تتفهم او تنتهي

.. !

..