الست بسيطة

الست بسيطة كانت أجمل ست عرفتها المنطقه, ولأنها خجولة حبتين ومابتعرفش تقول انها بتحب, عملت بنصيحة جدتها لما كانت بتعلمها التريكو زمان " اغزلي للي بتحبيهم الحب بإيدك"ا

بسيطة كان عندها ابر وخيوط ألوان مش عند حد

كانت كل فترة تغيب عن الشارع كل أهل الحتة يبقوا مستنظرين الحب المغزول في بلوفر او كوفية

بسيطة كانت تنزل تجيب خيوط محدش يعرف بتجيبهم منين

كل مرة وهي بتنقي الخيط كانت تتعدي بايدها على كل البكر تسلمه , تضمه لقلبها وتحسه بعدها تفرد طرف كل بكرة وتشم الخيط كأنها بتنقي ورد

كل مرة كانت تفتكر جدتها وهي بتقولها " على قد حبك للحبايب على قد تأنيكي في اختيار الخيط اللي هيحضنهم "ا

أهل الحتة اول ما يشموا ريحة البنفسج يعرفوا الست بسيطة رجعت وشايلة فايدها أكياس كتير ملونة , بتوزع ابتسامات جميلة على كل الخلق

وأول ما تدخل البيت أهل الحتة كلهم يفرحوا ويعرفوا انهم هيدوقوا حلو قريب

الرجالة ع القهوة يبقى رهانهم الست بسيطة بتغزل ايه المرة دي ؟

لو قعدت اسبوع تبقى كوفية لو قعدت اسبوعين يبقى بلوفر

عم حلاوة الفكهاني يستعد انه هيبقى يطلعلها الخضار والفاكهة لحد فوق

والواد سعد ابن الخباز يعرف انه هيتسعد بطلعته كل يوم برغيفين لشقة الست بسيطة

وأول ما شباك بيتهم يتفتح أهل الحتة يتجمعوا

ومع اول ظهور لعم جميل بالبلوفر الجديد يوزع عليهم مشبك وعسلية وهريسة بالقشطة

كل حد يبقى مستني عم جميل اكيد هييجي يسلم عليه يدا بيد واحتمال يلمس البلوفر الجديد وهو بيحضنه

عم جميل كان يقعد يقولها عن تعبها كل مرة وانه بقى صعب عليها مش زي زمان ويفهمها احنا كبرنا اديكي محتاجين يرتاحوا وعنيكي يناموا شوية

كانت تقوله بابتسامتها الجميلة اللي مفيش زيها " بسيطة يا جميل .. بسيطة "ا

بيتهم كان دايما دافي من كتر الصوف وريحة البنفسج اللي فيه

المرة الوحيدة اللي الناس سمعت صوتهم بيتخانقوا

هو كان بيقولها "اسمه زعبوط " وهي تقوله " لأ اسمه طرطور "

الاتنين كانوا عارفين ان البلوفرات والكوفيات والزعابيط المغزولين بحب اديها بيحضنوهم

لما بسيطة اخر مرة خرجت علشان تجيب خيوط جديدة غابت زيادة

عم جميل فضل قاعد ع الباب سقعان ومستني دفاها الجديد

لما عرف انها هتغيب زيادة طلع كل بلوفراته الصوف المغزولين باديها ولبسهم فوق بعضهم

واشترى محل تحت البيت ملاه ورد وكتب على يافطته " ورود بسيطة "أ

كان ينزل كل يوم بكل البلوفرات ويفضل قاعد قدام اليافطة ويقعد يكتب بخطه الجميل ويتفنن لحد ما يعمل يافطة جديدة مكتوبها عليها "ورود بسيطة "

ولما حد يقوله انه عايز ورد كان يرد وعينه ع اليافطة وايده على هدومه

" ادخل نقي الورد اللي تحسه "

ولما يحبوا يحاسبوه على الورد كان يرفض ويقولهم " بسيطة "ا

عم جميل كان بينام في محل الورد وهو متكلفت كل يوم بغزل المحبة بايدين بسيطة وريحة البنفسج

___________________

مستوحاة من محبة واقعية*