الباقي من باقينا

الورق الناعم الصغير نزل متبحتر على ورق شبهه لكن مش ناعم زيه

على ورق يشبهه لكن عطره تايه ومش حاضر

على ورق يشبهه لكن مش حي زيه مش قادر يطير رغم خفته حتى من روحه

ورق يشبهه لكن لونه عجز

نزل الورق ع الورق اتلخبطوا ف بعض لكن متاهوش ولا دابوا

العصافير من فوق الشجرة فضلت عارفه وشايفة فين الورق الللي لسة سايب اخر عطر منه على فرع الشجر

الورق اللى ساب آخر طرف له ف الزهرة و استسلم للوقوع والطيران والخفة وساب العصافير وصباحاتهم وساب نور الشمس من فوق الشجرة وساب باقيته الورق وطار

لما وقع ورق الورد رغم انهم اتخلبطوا لكن كل ورقة كانت عارفه فين باقيتها ومين من الورق يكمل الزهرة اللي كانوها سوا

كل ما لونهم كان بيروح ويختفي زياده كانوا بيخافوا اكتر يتوهوا من بعض

الشمس نورها ما بقاش قادر يوصلهم وهم ع الارض والمية ما بقتش قادرة تحييهم ولا توصلهم ما هم معادش لهم فرع يرويهم بايده ومن روحه

كل ورق اتبحتر من بعض كان بيحاول بشويش مع حبة الهوا الخفاف يزق نفسه ويقرب لبعض

كانت صعبة لكن كانوا عارفين ومطمئنين ان باقيتهم هنا على نفس الأرض

وان باقيتهم فوق الشجرة الطارحة من نفس الأرض

كتر الهوا والورد والورق اللي بيقع ويتبحتر غطى بيهم الأرض وتاهت اوراق الورد من بعض وما بقاش عارف كل ورق يجمع نفسه تاني وردة واحدة

المية ونور الشمس لما طرح شجر جديد وورد جديد زهر من الأرض صغير

كل وردة جديدة كان فيها ورقة من كل وردة كانت واقعة من قبلها

كل وردة كان فيها ورق كتير مايشبهش بعض لكن ألوانهم كانت طيبه وعطرهم كان مقربهم في وردة واحدة نور الشمس والمية والأرض الواحدة كانت مطمئناهم رغم غربتهم عن بعض

كل ورقة في سرها بالليل بتشوف حواليها فين باقيها الوردة ؟

بعضهم كان بيلاقي ورقة او ورقتين في ورد تاني جمبهم وبعضهم ماكنش بيلاقي باقيته وبعضهم كان بيلاقي كل الورق باقيته وباقي وردته

كانوا بيطمئنوا بعض بعطرهم انهم موجودين سوا وانهم ما بيضيعوش طول ما الأرض واحدة والهوا والطير اللي فوقيهم بيسافر من سما لسما لكن بيلاقي بعض وحسه مطمئنهم

كل ورقة كانت بتلاقي ورقة تعرفها من باقيتها كانت بتحس بمعجزة وتطمئن بمجرد وجودهم فوق أرض واحدة تحت السما الواحدة

بيقولوا " آمين "ا

يدوم النور والشمس وعطر أرواحهم وسكونهم وسلامهم ورجوعهم ورد تاني من بعد ما بيعجزوا ويقعوا ويتوهوا تحت الأرض ومعجزات تحييهم من تاني وتحيي ألوانهم وترجعهم ورد تاني

مع الوقت الأرض الواحدة صبح عليها كتير من الورد بألوان ماكنتش موجودة من سنين وعطر بيفوح لأول مرة حوالين جناحات وريش الطيور ف السما

وكل ورقة ورد عارفه تاريخ كل الورق اللي عملها وعمل لونها مع مر الوقت والنور والمعافرة والشمس والمية والعجز والاستسلام والتوهان والوقوع والضياع والتوهان والخفة والطلوع من الجدر والثبات على فروع شجر تانيين مش شجرهم الاول ولارضهم الاولى كل ورقة في وردة كانت عارفه انها تاريخ الأرض والزمن وتاريخ للمعجزة المجهولة

كل وقت الشمس والنور والعطر والهوا والشجر والطين والأرض والورد والورق والفروع الضعيفة والجدور الثابتة ف الارض وفي قدرة للمعافرة والمقاوحة حية وبتحاول تنبت زهر يفرح القلب والروح ويطمئن السما انها مش لوحدها وان في كون تاني حي ع الأرض وبيحاول