ستة خطاوي تايهة

فضل باصصله وهو نايم بعيد ع الأرض عارف ان كل الخلق مستعجلين رايحين وجايين حواليه

عارفهم من خطاويهم يا متأخرين أو عايزين يسبقوا او جايين يرتاحوا وهيمشوا بسرعة جدا

وعارف برضه الخطاوي اللي كأنها واقفة ما بتمشيش

فضل باصص له ورأسه على الطرابيزة وعينه الباصة ابعد بكتير وكوباية قهوته اللي نزلتله من بدري و حتى مسمعهاش وهي جياله وبتقعد قصاده ع الطرابيزة

وحتى مشمش ريحتها مع انها هي اللي فوقته علشان ينتبه ويلمحه

فضل باصصله ولأول مرة كان هو اللي يشفق على روحه وروح القاعد ع الكرسي لوحده مع كوباية قهوة مش ناقصة بوء

غير البوء اللي طمع فيه القهوجي وهو بيجيبهاله

كانت اول مرة يقوم من زمن ويتهز ديله وعنيه تلمع لمخلوق

قرب جدا منه بس ملمسهوش

فضل باصصله بعنيه في سكون تام

معرفش امتى اخد باله ولمحه وحرك رأسه في هدوء شديد وفضلوا باصين لبعض

متكلموش كأنهم بيسمعوا حكايات بعض من عنيهم

حكايات كل خطاويهم الأربعة او خطاويهم الاتنين

ومعافرتهم باديهم ورجليهم الأربعة

وعنيهم اللي دايما بتلمع مهما بان عليها عجزت

وقلبهم الحي دايما رغم ان نبضه بقى ابطأ بكتير من انه يتحسي

في لحظة بصوا لبعض يتأكدوا ان فيهم نفس

فهعموا بعض وابتسموا بسخرية كأنهم عارفين بعض

كانت اول مرة من سنين يقرب من مخلوق ويحسه ويسلم عليه

كانت اول مرة من سنين حد يطبطب عليه ويحضنه

فضلوا قاعدين جمب بعض في سكون تام

قام الراجل من ع الكرسي وساب القهوة لكن ماقمش لوحده

زي ما جه لوحده

قاموا سوا مشيوا سوا بخطاويهم الستة وقلب كل حد فيهم للغرابة بدأ يحاول يشاور ويقول انه كويس وانه لسة حي وانه مطمئن

فضلوا الاتنين ماشيين ماشيين في الطريق البعيد سوا محدش عرف من وقتها ولا شاف الكلب النايم هنا دايما راح فين

ولا الغريب اللي بقاله وقت بيلف على قهاوي البلد يطلب قهوة وينساها وينام وينساها ويمشي وينساها ويرجع ف النص الليل يحاسب عليها علشان يعرف ينام

..