المسافات

كانوا طواااااااااااااااااااااااال مايعرفش اولهم يشوف آخرهم

يمكن كل واحدة منهم بتشوف خط م الباقيين كانوا طوال لحد الزهق وطول المشاوير بالخوف والقلق من انهم مينتهوش

من الخوف من دوامهم سدين السكة ومبعدين القرب

الشجر اللي في الغابة كان محتاج يقرب ويتقابل ويمد جزوره تقابل بعض وتتنسد وتتروي من نفس المية وتفتح على نفس نور الشمس وتسمع حواديت البدر سوا ف الليل

لكن المسافات وطولها كان مخليهم مش عارفين حتى يشوفوا بعض لكن مخليهم عارفين انهم موجودين هنااااااك ف البعيد وهناك ف الأبعد والأبعد

كلهم خايفين لكن المسافات كانت زي الخطوط زي الحبال مشدودة بينهم بكل ثقة مكانوش عارفين هي المسافات سعيدة بوقفتها بينهم ولا مطورطة في كونها مسافات من غير اختيار زي ما هم ماختاروش يكونوا شجر

وكان نفسهم يكونوا عصافير وحمام أحرار وقربهم اسهل من مد الجزور بالجامد ف الطين لجل ما يسلموا على بعض

فكروا انهم لو مدوا جزورهم بالقوي وقرروا يقربوا يوم بعد يوم شوية معافرة ونور م الشمس يحاولوا يمكن يقربوا لكن قربهم هينهي وجود المسافات ويخفيها

وقفوا صالبين طولهم وخايفين والمسافات كل يوم تبص ف عينهم عارفه ان محدش قابل وجودها وفرقتهم

معرفوش لكن المسافات بصت للسما والأرض وسألتهم عن ما بينهم لو في فراغ يساع ليها

الأرض والسما فهمومها انهم موصلين من أول الكون والخلق موصولين بالهوا والنور ودفا الشمس الواصل والمطر موصول بريش الطيور وطيرانهم موصلين بعيون الخلق المبحلقين ومتأملين في السما ومنتظرين منها الفرج

موصولين بالقرب والمحبة والشجر المادد جزوره ف الارض ورافع روحه لفوق

المسافات حزنت زيادة ان ملهاش اي مكان وملهاش قبول بس سألت ما بعد السما عن سبب وجودها ومعرفتش وملقتش رد ومفهتمش

كل يوم الشجر يضيق بوجودها زيادة ويتوجع روحه بالبعد عن باقيته

المسافات قررت تمشي

الشجر فكر لو المسافات اختفت مش هيلاقوا براح يعرفوا يقفوا فيه وهيتزنقوا جمب بعض

المسافات والشجر سكتوا وحاولوا يفهموا

المسافات قررت تقطع من روحها وتوزع نفسها ومتقابلش بقيتها للأبد قسمت المسافات نفسها بين الشجر الشجر قرب شوية واتلاقى والقرب كان أجمل وأهون من كل الفات

المسافات سابت من روحها بينهم بما يسمحلهم بالسلام والارتواء م الارض والمية والنور والقرب والسند وغناوي العصافير سوا على اعشاشهم في الليل

المسافات بعد ما كانت ملت من صلب طولها بالعرض بينهم حست بالونس في القرب جمب كل منهم رغم بعترة روحها