الورد كان جمب الورد

الورد كان جمب الورد في الجنينة

ورد كتير لكن ميشبهش بعضه ورد كتير بألوان كتير كلهم باصين بأرواحهم للسما والشمس والهوا والبراح

كلهم مادين جدورهم في الأرض والطين

كل فرع شايل نفسه وورده وواقف بطوله

لكن في الأرض والطين كل الجدور موصولة ببعض كل الجدور مشبكة وحاضنة بعض

كلهم بيرتوا بنفس المية اللي جاية حالا م النيل اللي الشمس صبحت عليه جي بجمال لونه وروحه وبطمية الطيب جدا من طين أرضه

المية كافية تروي كل الورد وجدوره المية كافيه تصبحهم كلهم قادرين يفتحوا عنيهم ويطلوا ع الشمس والسما

كل صبح الورد كله يصحى يفتح

كل ورد بلونه وريحته الطيبة ويميل الورد يصبح على بعضه ويفوح بريحته في السلام والقرب والجدور تشبك في بعض بزيادة يوم عن يوم

الورد في الأرض دي كان كتير ألوان وريحة وشكل لكن مع الوقت يمكن الورد قرب يشبه لبعض يمكن عطر الورد سوا عمل عطر م الجنة

الفايت من جنب الأرض ماكنش يقدر مايقعدش فيها ويملي عينه بجمالهم ألوان كتير وورد بيسلم على كل الخلق

الشمس دايما وهي باصة من فوق كانت بتسأل كل السحاب عن الجمال اللي بتشوفه وكل يوم تقولهم هو في ورد جديد طرح ؟ هو في عطر جديد بيفوح ؟

فيحاول السحاب والسما يعرف ومايعرفش

تحاول العصافير تفهم ولا تفهمش

لكن الجدور والطين والطمي والمية كانوا عارفين ان الورد كله الواقف سوا ومادد جدره في نفس الأرض كل ورد لسة لونه وعطره لكن بينهم طرح ورد ماكنش اي حد يشوفه ورد بعطر ولون جديد من كل ألوانهم وعطرهم ورد مقرب المسافات بينهم ومخلي الأرض كلها ورد رغم البراح والوسع

عصفور صغير طلع للشمس وميل عليها وشوشها وقالها ان اللي شيفاه حقيقة في ورد جديد بين الورد طارح متشاف ومش موجود