السحابة

السحابة كانت كبيرة فوق النخل والبحر والبر والرملة

السما كانت بتتشكل كل شوية شكل لوحة وألوان

الشمس كانت بتلعب لعبة مع الكون,

كانوا بيجربوا يسحروا عيون الخلق ويشاورولهم عن فوق يبصوا فوق يمكن عيونهم ترتاح شوية م الزحام

الخلق مش كلهم عرفوا يشوفوا الكون في لحظة سحرية ملونة ومعجزة تسحر الروح وتطيب وتداوي العيون بالجمال

خلق كتير كانت بتجري مستعجلين او خايفين من الأرض والحفر وخلق كانوا بس مبلحقين بالسما ولعبة النور والشمس والسحابة

السحابة فضلت تقسم من روحها سحب صغيرة كل سحابة تروح فين ما تحب وترسم نفسها على كيفها

العصافير كانت اسعد ما يكون بانهم جزء م الحكاية ولعبة الشمس

طلعت سحابة صغيرة لرب الكون سكنت في وجوده وحضوره

بياضها, كان بيقول انها عافرت كتير علشان تعرف تعلى اكتر من بين كل السحب

وصولها من غير عصافير عليها, كان بيقول انها سلمت عليهم كلهم ف طريقها

طريقها اللي قابلت فيه عصفور صغير عمال يفوت على كل السحب والشمس وبين النور وعلى اكتاف البشر يسأل ازاي قلبه يرتاح من جمال الحاصل ازاي روحه تهدأ او جناحه يرتاح ويبطل طيران وميكنش جزء من المعجزة

طلعت السحابة تسأل رب الكون لا عرفت ولا قدرت يمكن تكون لما وصلت فهمت زيادة

يمكن ترجع للسما يمكن تحكي للعصفور الصغير يمكن تفوت تاني بين النور او تظل عند رب الكون

...