احنا مستنيينا هناك

كانت دايما تقول " دايما في حكايات مستنيانا نحكيها دايما في صبح مستنينيا نشوف ضيه دايما في خطاوي مستنيانا نخطيها دايما في احنا مستنيينا هناك "

كنا صغيرين وعنينيا مبحلقه دايما ع اللي بتشاورلنا عليه هناك بالنهار كنا نسألها عن حكاية النهردة, تشاور وتقولنا "هناك اهيه الحكاية مستنياكم" فنفضل طول اليوم نسألها نروحلها ازاي ؟ توصفلنا السكة وتفضل تشاور وتقولنا "هناك استنوها زي ما هي مستنياكوا" كنا بنتلخبط ومنعرفش مين مستني مين لكن بالليل كانت تنادينا وتقولنا "وصلنا وصلنا, ووصلت الحكاية سلموا عليها " نقعد كلنا حواليها ونسلم ع الحكاية كأنها طالة علينا بدخلتها وتبدأ هي تميل بودنها وتسمع وتقولنا كأن الحكاية بتتقال لها أول بأول لما مرة سألتها اني عايز انا اللي الحكاية توشوشني, اتبسمت وناديتني جمبها وقالتلي " اللي تشوفه احكيه " بكف ايدها حطيتلي كف ايدي على قلبي وضمتني قرب منها الاول كنت بضحك وهي بتحركني كأني عروسة من ايديا لكن لما فعلا بدأت اسمع وأشوف, خفت لما اترعشت طببت على رأسي ونزلت قعدت جمب العيال ع الارض وقالتلي خلينا نسلم ع الحكاية الي كانت مستنياك حسيت اني سامع وشايف معرفش ساعتها قلت ايه كنت شوية بشوفهم بيبتسموا او يميلوا بودانهم لما حسيت اني تعبت وعايز ارتاح لاقيتهم كلهم حاطين اديهم على قلوبهم وبيسمعوا ومبحلقين لما سمعت حسي سكتت وبطلت كلام لاقيت عيونهم بتلمع وطيبة كأنهم عرفوا سر او كأن جاتلهم هدية او امنية مستنيينها تتحق من بعدها محدش خالص اتكلم في الحكاية ,قامت هي وقالت لنا "في احلام مستنياكم تحلموها, متسيبوش احلامكم تنام لوحدها وتخاف ومتتأخروش عليها لو اتأخرتوا هتجيلكم احلام تانية مش احلامكم يمكن متكنش حلوة زيكم لكن انتم احلامك حلوة روحوا قابلوها " بالنهار صحتنا وقالتلنا "في خطاوي مستنياكم تخطوها, وكلام مستنييكم تقولوه, ولعب مستنيكم تلعبوه, وعلام مستنييكم تتعلموه, متخليهمش يستنوا لوحدهم روحوا ونسوهم بيكم " لما لبست هدوم المدرسة وشنطتي شاورتلي استنى ! استغربت مين ممكن يكون مستنيييني استناه غير اللعب والمدرسة والرملة والكراريس اكتب فيهم استنيت فضلت طول اليوم قاعد جمبها والشباك مفتوح وهي باصة ع الشمس وساكتة بعد وقت قالتلي ان خطاوية سريعة, واني بجري طول الوقت فاكر اني متأخر, واني بسبق الحاجات اللي مستنياني وبروح استناها من بدري, واني كدا هبقى بسابق الوقت" ولو سبقت الوقت والحاجات لما هوصل مش هلاقي اي حاجة او حد, وهستنى كتير لوحدي قالتلي ان الحاجات يمكن تـتأخر, يمكن تغيب,يمكن متجيش خالص, زي ما انت ماروحتش النهردة للمدرسة والكراريس وزمانهم مستنيينك مركونين وزعلانين من غيرك ماهو مين هيكتب في كراريسك غير انت؟ معرفتش اصدقها لاني عارف من بين كل العيال انا آخر واحد بيخلص في الكتابة وآخر واحد بيرفع ايده قبل ما يجاوب واخر واحد بينزل الحوش علشان يقابل اللعب اللي مستنيه وآخر واحد بيوصل للبيت وانه يعني لما قلتلها اني عايز الحكاية توشوشني بدالها ماكنش علشان انا سبقت الحكاية لكني بس ماكنتش سامع صوتها وهي بتحكي كان نفسي اسمع صوت الحكاية بنفسي مقلتلهاش كل الكلام لكن كانت بصالي كأنها سامعاني كويس جدا خلتني افرد ايديا زي العصفور واقف على رجلي وارفع رأسي لفوق ماكنتش عارف اقف وماكنتش مرتاح وقعت وقلتلها اني مابعرفش اجري ولا هعرف أطير واني مش هسبق ابدا لاني على طول متاخر وكل الحاجات سابقاني وطلعت اجري وانا بعيط علشان متأخر ع المدرسة والكشاكيل واللعب وزعلني زعلهم النهردة وانا واقف مستني اللعب والكراريس والعيال والحوش والصبورة والطباشير قبل الطابور الصبح افتكرتها وقعت يمكن من كتر الضحك على كل السنين اللي فاتت على كل يوم كنت بجري انزل بدري علشان الحق الطابور والحوش واستنى العيال واللعب واول ماوصلوا وفتحوا الكشاكيل وقالولي هننرسم ايه النهردة عرفت ان كلهم مستعجلين زيي وبيوصلوا قبل الحاجات اللي مستنياهم قلتلهم هنرسم انتوا اللي مستنيينكم هناك.. تعرفوا تعرفوهم ؟

LikeShow more reactions