وشوشهم قال...

وشوشهم من فوق السحابه وقالهم الحكاية مش سهلة, الحكاية مش صعبة, الحكاية بتاعتكم

مش كل الخلق كانت سامعة مش كل الخلق كانت حاضرة

ومش كل الخلق صدقت وكتير من الخلق خافوا

الخلق اتبحترت من بعض في كل كون حبة, في كل ركن بعضهم, في مكان قليل منهم

لكن هناك كان دايما واقف لابس على رأسه طرطور كبيييير عامله بايده من ورقة شجرة خضراء مابتدبلش

ولابس سالوبت عليه دواير حمراء بلون الطماطم اللي كان بيلمها م الأرض كل يوم وياخد واحدة ياكلها

و وهو بياكلها يلون دايرة جديدة حمراء على السالوبت الاصفر

دايما ماشي برجليه الكبيرة وابتسامته اللي تساع الكون وصوت ضحكته الطيب

دايما بيضحك, دايما ما بيتكلمش

ماحدش ابدا فهم هو سامعهم ولا مش شايفهم ولا هو منين

ودايما هناك تحت ظل الشجرة كان قاعد واحد تاني وسط الغابة مابيتحركش لحد ما افتكروه جدر الشجرة الثابت ف الارض

وكان هناك فراشات وخلق كتير ملونين بكل الألوان اللي لابسين برانيط واللي لابسين عيون على عيونهم واللي رجليهم اطول من الشجر وبيشوفوا السما من بين العصافير

كان هناك فراشات فسدقي وعصافير زرقاء وورد اصفر وقوس قزح وشمس بتطل كل يوم وهلال بيكبر ويزيد نوره كل ما يقرب للشمس

صوت العصافير كان دايما ونس مع صوت ضحك ابو برنيطة مابتدبلش

لكن دايما صوت ضحكته كان اكبر منه

ماحدش كان فاهم لكن العصافير الشايفه من فوق كانت عارفه

ان في كل ركن فيه حد بطرطور وضحكته تساع الكون

وحد مركون تحت ظل الشجر

وناس تايهة وناس خايفة وخلق مستخبية وخلق بتجري وخلق بتتشعلق بين السحب وعيال بتمرجح على قوس قزح

ونقط مية بتوصل بين السما والأرض وتعمل في كل حفرة طين قوس قزح صغير يفرح قلب وروح اللي معدي

وكان دايما كل ما يبص بعض منهم او كلهم او قليل منهم لفوق كانوا يلاقوه بيوشوشهم ويقولهم

الحكاية مش سهلة

الحكاية مش صعبة

الحكاية بتاعتكم ..