أول خطاوي البراح

نجم منور وسط النجوم والسما

شايف كل نجمة حواليه ابعد مسافة لكن منورة

وشايف في البعيد على مد الشوف نجوم تشبههم لكن مش منورين

نجوم متنتورين مش في ازرق السما لكن في البراح الملون

ايام يشوفهم في سما صفراء وايام يشوفهم في سما خضراء وايام يشوفهم في سماوات ضيقة جدا ومحددة وبلا لون او بلون اماكن خواء القمر

نجم كان بيسأل نفسه هو القمر فيه خواء ولا حفر و ندوب

وكان دايما القمر يرد على نجم في سكون وسلام ميتكلمش لكن عنيه كان فيها من الحكمة كتير يخلي نجم يطمئن ان القمر مطمئن

نجم حاول كتير يبعت حكايات ومراسيل تعارف ونور ومحبة للنجوم اللي في السماوات البعيدة

وولا مرة كان بيجيله رد

في ايام كان بيقرب منها نجوم بيضاء صغيرة بتمشي واحيانا نجوم كبيرااااااااااة بيضاوية وملونة

في مرة قربت نجمة ملونة الوان كتير جدا قرب منه

في لحظة سريعة جدا حاول انه ينط جواها يمكن تكون بتوصل للسماوات الملونة البعيدة

لما دخل جواها فضلت تطير من مكان لمكان بخفة وهدوء وسلام

وفي لحظة سمع اصوت كتير جدا وشاف نجمة بتسيب النجمة وتنط منها وصوت تاني بيردد

"أول نطة م المنطاد تمت بسلام - نجم بدأ رحلته الزمنية للهبوط للأرض احسب الزمن "

نجم فضل مبحلق للشيء اللي قدامه لا هو قمر ولا هو نجم ولا هو سحب

وازاي بيقول ان نجم في رحلة زمنية للارض هو انا بهبط للارض وهو يعرفني منين ؟

نجم بعد لحظة سمع نفس الصوت بيقول " تاني نطة م المنطاد بعد اخر ضغطة من الآن احسب الزمن من الآن " ا

وفي لحظة كان المخلوق بينط

نجم محسش بحاجة غير والنجمة الملونة كلها بسرعة عملاقة بتنزل والهوا جواها بيفضل وبتطير زي عصفورة فقدت وطنها

بعد لحظات نجم حس بسما حس انه وصل او رجع معرفش يعرف

ولما طل ع البعيد شاف سما براح زرقا منورها نجوم صغيرة جدا وقمر منور معرفوش غير من شكل هلاله وجمال طلته

لما شافه كان منور ومطمئن ومحب وكل الحفر او الندوب اللي كان بيلمحها في القمر من هناك مشافهاش

مشافش من سماه الجديدة غير نور القمر والنجوم

وحواليه بدأ يوصله ردود كل الجوابات والمراسيل والمحبة اللي كان بيبعتها للسما الملنوة دي من سماه