برقوق وقمر

من بعيد جدا كان نورهم بيفضل واصل وكان دايما برقوق نوره اصغر م القمر

لكن برقوق دايما كان بيضوي وسط باقي النجوم في السما

لما القمر كان كامل برقوق نوره كان صغير جدا جمبه

لما الشمس بقت تسيب القمر بشويش وبدأت يصغر ونوره يقل

برقوق خاف واترعب

وهو شايف قمر بيصغر واحدة واحدة

برقوق كان النجم الاقرب لقمر لكن لما قمر مبقاش قمر وبقى هلال برقوق لولا ان عينه كانت على قمر طول الوقت كان يمكن ميعرفوش لكنه كان عارفه كويس وحاسس نوره وشايفه

واحدة واحدة الشمس بتسيب قمر, واحدة واحدة قمر بيصغر بيصغر لحد ما بقى خط نور صغير جدا

ساعتها برقوق ارتبك يعني ايه قمر ممكن يفضل يصغر لحد ما يبقى قد برقوق؟ ويمكن اصغر !!؟

يا خبر برقوق معرفش يتخيل السما من غير نور قمر الكامل

فضل برقوق ليلتها يضوي ويلمع ويحكي لكل النجوم والنجمات حواليه ويفكر يفكر يعمل ايه يعمل ايه ؟؟

برقوق متحركش من جمب قمر لا يصغر اكتر ولما يرجع ميعرفش يشوفه

فضل سانده بنوره وساند ضيه عليه لجل ما يطمئنهم

النجوم ماكنوش فاهمين هو برقوق قلقان ليه ما قمر اهو نوره كامل

برقوق استغرب يعني ايه نوره كامل انا شايفه بيصغر جدا

النجوم بصت لبعض وبدأت تضحك على برقوق وقمر كان ساكت من كتر جمال سند برقوق له

ماكنش عارفه يتكلم ولا حتى يخليهم يبطلوا ضحك ماهو برقوق كان جميل جمال يخلي القلب يبتسم ان فيه نجوم بجمال ضيه

ضيه اللي فضل ساعتها طول الليل جمب قمر يضوي ويضوي لحد ما شمس نفسها حست انها لازم تعمل حاجة لكنه ماكنش ينفع ترجع لقمر تاني لكنها لفت حوالين برقوق ونورته زيادة

ساعتها ماكانوش عارفين الفرق بين برقوق وبين قمر كان برقوق وقف نفسه مكان الجزء الناقص في قمر وكأنهم صبحوا ضي واحد

برقوق النجم الصغير جدا جدا اللي كنت تشوفه من بعيد تبتسم لجمال وصغر حجمه وابتسامته العيلة جدا لو شفته ساعتها يمكن ماكنتش تعرفه, كان اكبر من القمر وضيه

كأنه القمر الأول في الكون او كأنه الكون نفسه, عيونه وضيه كانوا أكبر وبيزيدوا لجل ما يكملوا ضي القمر وقت غياب بعضه ولكل ما يطمئن روحه باكتمال رفيقه ..

....