قوقع ف المحيط

https://soundcloud.com/gianniventola/il-postino-luis-bacalov

المحيط كان واسع وبراح زرقته كانت ازرق م السما اللي محاوطة الشمس بنورها اللي بيخليه شفاف كل ما تطل عليه

القوقع الصغير جدا جدا كان بيحب النور كان بيحب لما المية توريه شوية اللي فويقيها

عمره ما كان بيشوف كويس ايه اللي بينور كل وقت طويل ويغيب ويرجع تاني ينورله المية ويخليها شفافه

القوقع كان فاكر نفسه القوقع وطول الوقت كان مكلفت نفسه جوا نفسه كان بيطل كل فترة اول ما النور يجي ويسخبى جواه لما النور يغيب والمحيط يبقى ظلمة ومخيف

ماكنش يعرف حاجات كتير عن المحيط ولا عن نفسه ولا عن النور والظلمة كان بس بيطمئن ساعات ويخاف احيانا

بعد ايام فاتوا رياح مهاجرة كانوا مسافرين من الشمال للجنوب كانوا كل حبات الهوا والنسيم ماسكين في بعض بقوة جدا لجل ما يوصلوا اسرع لجل ما محدش فيهم يتوه في براح السما ماكنوش يعرفوا ان لما هيفوتوا بسرعة قوية كدا ان في مخلوقات تانية هتتوه عن نفسها

فاتت الرياح وكملت رحلة هجرتها اخدت من المحيط حبة مية ومن الصحراء حبة رملة ومن مخلوقات الصحراء كتير فاقت لقىت نفسها مش في ارضها ومن مخلوقات المحيط كان الوقع بعد ما عدت الرياح القوية وبعد ما بدأ يفتح عيونه الصغيرين حس ببرد لاول مرة بيوجعه حس انه ناقصه شيء مهم حس انه مش معاه وانه المحيط تحته مش هو

لكن النور اللي دايما كان بيجيله من فوق كان هو

حسس القوقع على نفسه ملقاش القوقع ملقاش غير روحه ونفسه جسمه الصغير الناعم جدا والقوقع نفسه الصدفة مش حواليه فضل يتلفت كتير كتير ملقاش باقيته

فضل مبحلق بنور فوق اللي مخلي المية شفافة

المية اللي لما بدأ يدوقها حس طعمها غير ..طعمها احلى واخف على روحه مش زي المية الاولى

لكن فضل حزين انه من غير باقيته بعد وقت كانت اول مرة يعرف انه يقدر يخطي خطوات يدور فيها على القوقع علشان يجري يستخبى جواه قبل ما النور يختفي

لكن مفيش فايدة ملقاش القوقع باقيته ونفسه والنور اختفى لكن لاول مرة كان يسمع اصوات غير اللي بتخوفه كانت اول مرة يشوف انوار بالوان تانية وسط الضلمة

شاف انوار وسمع اصوات طيبة اصوات متشبهش لأصوات المية ولا تشبه لاصوات الاسماك اللي كان يعرفهم اصوات كتيرمختلفة ونور الوانه مختلف نور اصفر يشبه لنور الشمس ونور ابيض ميعرفوش واحدة واحدة الفضول خلاه يخطي ويزق نفسه زيادة يقرب م الاصوات

مرة واحدة حس ان الاصوات هي اللي بتقرب ناحيته وفجأة شاف عيون كتير باصة عليه كأنها بتكلمه

في شيء مش زي الرملة شاله على ايده يمكن نفس لون رملة المحيط ابيض او اصفر شوية لكن ناعم مش زي حبات الرملة

قوقع كان ضعيف جدا من غير الصدفة والكف الصغير اللي شاله كان خايف عليه وجرى جرى في الرملة لحد ما نقى صدفة تانية فاضية مفهاش حد وحط القوقع جواه وقاله ده بيتك الجديد قوقع اول ما حس نفسه جوا الصدفة اطمئن انه لقى نفسه لكن بعد وقت عرف انه لسة بردان القوقع كبيييير جدا عليه فوقع منه

الولد الصغير قعد يضحك كتير جدا واخده تاني ونقاله صدفة تانية اصغر وفضلوا طول الليل من صدفة لصدفة لحد ما القوقع يلاقي لروحه بيت جديد ساعتها عرف انه مجرد بيت وانه مش باقيته ولا حاجة وانه في منه كتير لكن فضل حاسس ان باقيته وبيته ضاع منه لكن هو ونفسه لسة سوا

الولد الصغير لقاله بيت جديد ورجعه تاني للشط والمية كانت اول مرة قوقع يقدر يتحرك ويزق نفسه ببيته بعد ما كان ف المحيط بس بيطلع راسه مع نور الشمس ويستخبى بالليل في الضلمة

قوقع حس بتقل كبير جدا عليه لكن حس انه لازم يخطي بالبيت علشان وقت لما الرياح تيجي تاني تاخد البيت وتوديه لمكان تاني يدور على قوقع تاني يسكن جواه وهو يدور على بيت تاني

فضل قوقع ماشي على طرف المية عجباه الحكاية لكن في عنيه سؤال ليه ؟

وساعتها حس فجأ’ة انه اخيرا ببقى برة المية وانه يقدر يعرف ايه النور اللي كان بينورله كل يوم

استنى طول الليل ع الشط و نام القوقع م التعب لما فاق كان النور في وسط السما منور من غير ما يعرف برضه ازاي ده بيحصل لكن عرف النور ده فين مكانه ولونه وعرف ان النور بيمشي وسط السما وبيسافر زي الرياح اللي سافرت وطلعته م المحيط

وانه في الضلمة بيظهر نور تاني بيمشي ويتحرك وينور ويكبر ويصغر ويضيع باقيته

ويرجع يكتمل ويرجع نور النهار كل يوم قوقع بقى حاسس ان في سر جديد بيعرفه عيونه وسعت اكتر من كتر الاسئلة وكبر شوية وبقى اقوى من لما كان وسط المحيط ومع الايام عرف سر تاني ان المية بتهاديه وتعزله بيت جديد كل ما تهل عليه تقعد شوية معاه وترجع المية يلاقي صدفة فوق منه بتكبر زيادة عرف ساعتها ان ده هيكون بيته هو من البحر وفضل من مية البحر لمية النيل لمية المحيط ومن شط لشط مع كل طلعة للنور في براح السما كان بيعرف سر جديد عن اللي برة المحيط