رابع خطاوي القمر

القمر عارف انه فضلة لكن ضلمة وانه مش بينور غير لما الشمس او النجوم تفوت من جواره فيزيد نوره وجماله فكان دايما بيحكي ويسلم ع النجوم والشمس والكواكب جيرانه

ولما كان بيبص ع الارض ويسلم عليها كان بيشوف عليها مخلوقات صغيرة

لكن قلوبهم حكاياتهم كبيرة

كان ما بيصدق الشمس تفوت من جواره وتقوله انا سبتهم في نص الكون ومستنيين ظهورك يجري ينور ويتسعد لحكايات الليل الطويلة ودفاهم

كان بيقعد طول الليل هو ونجوم السما يسمعوا الحكايات من المخلوقات

بعضهم كان بيحكيله وهو باصصله من الشباك ويخلص الحكاية ويتكلفت بدفا وطرطور وينام

وبعضهم كان بيفضل مبحلق له في الصحراء وهو تايه وعيونه كلها اسئلة هيمشي ازاي وهيوصل ولا هيفضل تايه

وبعضهم كان بيحكيله وهو بيسال ياترى سامعني ؟

وبعضهم كان بيبقى عارفه انه سامع وبيستنى منه الرد

اكتر من كان بيحبهم القمر العيال

مش شرط يكون حجهم صغير لكن العيال

دايما القمر كان بيحكي للشمس عن مخلوقات كبيرة لكن قلوبهم وحكاياتهم حكايات عيال

وان هم دول بس اللي بيصدقوه وبيسمعوه لما بيحكيلهم هو كمان

مع انه هو كمان بيسأل هم فعلا سامعيني ؟ هو فعلا ردي وحكاياتي واصلاهم ؟

الشمس كانت بتحكيله لما بتسيبه وتروح النص التاني وتقوله ان شوفتك من هناك من هناك انت شكلك صغياااااااااار قوي يا قمر

مع انك كبير اوي يا قمر

وكان بيستغرب ويقولها تعرفي انا كمان بشوفك لما بتروحي الناحية التانية وبتكوني صغيراااااااااة اوي لكن نورك دايما بيفضل منورني

ويٍسألها لو بتشوفه صغيروم نور ولا بيكون صغير وضلمة ؟

كان دايما بيقولها اهم حاجة النور حتى لو نمنم

لكن وقتها كان بيفكر

انه طب ما زي ما الشمس شيفاه صغير من هناك وهو شايفها صغيرة زي ما هو شايف مخلوقات الكون صغيرين !!!

يبقى هم كمان شايفيني صغير !!!

ساعتها زعل لانه من عندهم هيكون صغير جدا جدا جدا ويمكن ميشوفوهوش وسط السما والنجوم

ومبقاش مصدق انه يحكيلهم حواديت وتوصلهم

وكل ما يزهق ويلاقي انه مفيش فايدة وهو بيحب يحكيلهم حواديت حتى لو مش هيسمعوه حتى لو مش هيوصل

هو بيحب يشوفهم وهم مبحلقين للسما حتى لو مش شايفينه

وكان بيقعد يحكيلهم حكايتا طول الليل

لكن قلبه دايما جواه سؤال

ودايما كان بيسمع وشوشه من بعيييييييييييد وهزة رأس العيال بطراطيرهم اللي على روسهم

ايوة ايوة سامعينك

ايوة ايوة بمحلقينلك انت بنورك في السما

لكنه كان بيخاف يكون بيتهياله وانه مجرد نقطة منورة في السما البراح

لكن عمره ما قدر يبطل يحكي

وعمر ما العيال على الارض ما بطلوا يتنططوا ويشاوروله بالجامد ويهزوا {رأسهم ويقولوه بعلو صوتهم ويحكوله حواديتهم

وعمر ما باقي المخلوقات المش عيال ما بطلت تسأل هو القمر سامعنا فعلا ولا بيتهيألنا !

القمر كل يوم بيجيله صوت ان حكاياته واصلة

وانه الرد واصل وانه فعلا بيحكي مع العيال ع الارض مش انه بيتهيأله

حتى لو ماكنوش موجودين

حتى لو الباقي منهم طراطيرهم فاضية من غيرهم

كان بيحكفيه تصديقه ان الحكايات واصلة

ونوره دايما واصل

والشمس دايما مصدقه انه لازم تفوت من جواره لجل نورهم ينور الكون

ما هو هم حاجة النور

....