ستي زهره

ستي اللي علمتني فتح الشباك والوقوف بالساعات العين سارحة في براح السماء

ستي اللي كانت دايما تقول "اللي يبص للقمر من ورا الازاز .. تندهة النداهة "

فتحت الازاز واتندهت ..

ستي زهرة اللي تحس انها حتة م السماء ع الارض .. ما يخلاش الازرق من روحها ومن جلابيتها .. كانت دايما تاخدني من ايدي ونقعد ع الشط عند النيل نمشي كل الطريق حافيين كانت تقولي "القدم لازم تلمس ارض الكون والا الروح تفسد"

كانت بتحكيلي دايما ان ستها نزلت النيل قبل ما تولد امها واول مانزلت امها نزلت في الطمي ولما طلعوها جسمها كان شفاف زي المية وشافوا روحها بجمال خلق الله ..

وان امها برضه ولدتها في طمي النيل كانت دايما تقولي " انا من تحت المية دي من طين النيل الازرق وانت كمان منه رغم ان امك مرضتش تولدك غير على يد داية ف البيت "

قالتلي انها بعد الولادة سهت امي وخدتني حمتني في النيل وانه علشان كدا انا الوحيدة اللي عمري ما مرضت عكس كل عيال البلد ..

كانت دايما تقول " الازرق هو اللي يحفظنا ويراعينا ويبعد عنا شر العين والحسد " ستي ما يخلاش من جلبيتها الازرق الوحيدة في البلد اللي كحل عيونها ازرق .. كان لازم يكون اسود علشان يحمي العيون م الشمس .. بس كانت دايما تقولي وهي بتضحك

" العين عليها حارس .. والحارس الله "

ستي اللي كانت كل جمعة تصحيني على احلى صوت برقوتها للبيت وتطلع من علبة نحاس حمراء بخور كأنها م الجنة ..وتركيبة من صنع ايدها ترش منها في كل ركن ف البيت على رايها " الرقوة تصون " ..

تبخر البيت والشبابيك كلها مقفولة وتفضل تقول .." نور صبحك يا الله بيشرق جوا الروح

نور جمالك واصلنا وامانة ..

امانتك نصونها والرقوة تحمينا ..

من ستي وستها وست ستها يوصل سلام المحبوبيون بالسلام والبركة..

والسلام امانة ..

صبح الصباح يا رب بنورك في ارضك..

واحنا نشبه لذرات التراب في بحر كونك الواسع ..

تحمينا من الضياع والتوهة ..

وتدل خاطوينا ..

وتوصلنا بالسلامة لارضك الخضراء ..

وترجع الامانة لصاحب الامانة

بطيب نداها وجمال لسمتك فيها ..

صبح الصباح بنورك الشافي ونورك لينا دليل .."

وبعد حبة تفتح الشبابيك تاخد البخور وتطلع تلف على بيت بيت كأنها بتبخر البلد والناس.. كانت دايما تقول " فرقوا الدفا الجواني يفوح "

فاكرة اول ما فاطمة جارتنا تعبت التعب اياه ومبقتش قادرة تخطي ولا تشوفنا ستي سحبتني من ايدي ووطت عليا وقالتلي تروحي تجيبي سبع قشات من 7 بيوت حوالين بيت فاطمة وانتي رايحة وانتي راجعة متكلميش حد واوعي عينك تبص في عين حد رايح ولا راجع وان حد سالك عن اي حاجة سمي في سرك سبع مرات ..

يومهاحسيت باول امانة تتعلق في رقبتي شفا فاطمة بقى مسؤليتي

جبت القش.. ستي حطت المبخرة في نصف اوضة فاطمة وخطت فاطمة 7 مرات وهي متسندة على كتفي 7 مرات بعدد 7 ايام الاسبوع اللي ممكن تكون صابتها عين فيهم.. وراقيتها رقوة تطمن القلب والروح .. نامت فاطمة 7 ليالي وانا وستي مافاريقنهاش لحظة .. ولما قدرت تفتح ستي اللي كانت تعبت..

ستي لما كنت اتعب شوية تدخل اوضتها وترجع تكحلني بمكحلتها ..تحط ايدها الطيبة على راسي وترقيني ..تمسح على صدري.. تدخل اوضتي وتنام مطرحي ليلة وانام مطرحها ..وتاني يوم تصحى تقولي شفتهم ووصيتهم عليكي حليت بينك وبينهم خلاص اطمئني هيراعوكي..

عمري ما كنت بعرف هم مين بس كنت بطمئن لما بتطمئني ..

كل ليلة كنا نقعد عند النيل واسمع منها حكايات م الجنة ..معرفش كانت بتجيبهم منين كتير كانت بتميل برأسها يمين كأنها بتسمع الحكاية في ساعتها وكان حد بيوشوشها في سرها وتحكيلي ..

وكنت بالليل اسرح في السما م الشباك المفتوح وافتكر حكايتاها عن النداهة ..

كتير كنت بحس ان النداهة اللي بتسحر الناس بجمالها لازم تكون ستي .. اجمل ست في البلد

وايدها شافية وبتعافي العليل ..

ستي دايما كانت تقولي "اياكي تسيبي الازق يطلع منك " حطي دايما ازرق معاكي ..

اخر ليلة ليها ندهتني من اوضتها طلعت علبة من دولابها , فردت قماشة قماش زرقاء ومن وسط حاجات كتير ملمحتهاش اديتني جعران وقاللتي "حتى الجعارين من طين الازرق جمال بجمال خلق الله زيك وضحكتلي "..

خليه على صدرك يصونك ويحميكي ويبعد عنك كل عين مؤذية ويطمئن قلبك وروحك ..

ستي ديما كانت تحط ايدها على صدري تشاورلي وتقولي "روحك هنا خلي بالك عليها" . سابتني واختفت ف ليلة كانها ماكنتش هنا كل الوقت ده ..

بس ريحتها اللي فكل ركن ف البيت وفكل بيت ف البلد كان تفوح كل نهار جمعة وكل ليلة ساعة الفجر ..

وكل ما كنت اروح عند النيل كنت الاقي اثار رجليها ع الرملة بطول الطريق ..

لما مشيت فضلت انام مطرحها 7 ليالي.. 7 ليالي كنت بشوفها وتقعد تحكيلي .. 7 ليالي لحد ما آمنت " ستي ما مشيتش " وفي اخر ليلة سقيتني من ايدها من ترياق الجنة وشربت نفسها ..وعرفت ان بقى فيا منها ..

وعرفتهم ساعتها ..هم.. اللي كانت دايما تحكيلي عنهم وتقولي لما كنت ازهق واقولها "اني لوحدي ف الدنيا كانت تقولي "عمرنا ما هنبقى لوحدينا ماهم معانا مونسينا اهم ..

رجعت اوضتي وفاول ليلة لاقيت تحت مخدتي قماشة قطيفة فيها بخور من بخورها اللي م الجنة ولاقيت كف نحاس له علاقة .. كف فاطمة ومريم زي ما كانت بتحكيلي .. عرفت ان دي كف ايدها اللي هيطمئن روحي من بعدها ويحميني من كل شيء يئذيني ..

الازرق ما بيطلعش م الروح الازرق يبرد العين الحزينة ويطمن الروح زي ستي ..