لما اتكلمنا مزيكا

شارع طويل جدا وباين بكل ألوان الدنيا

في بلياتشو واراجوزات في كل حتة

وانا لابسة بلياتشو

طرطور كبير جدا مخطط اخضر واحمر وبرتقالي

وسالوبت عملاق جدا منقط

أرضيته صفرا والنقط بيضا

صوتي مش صوتي

صوتي صوت أراجوز

وبعد وقت بيبقى صوت مزيكا

كل ما أتكلم ما أعرفش أقول

كل ما اتكلم يطلع الكلام مزيكا

طرمبيطة وزمامير ودق طبل

معايا بالونات كتير

لابسة العصيان الخشب الطويلة وقادرة امشي بيهم

سعيدة جدا بوجودي فوق

في عصفورة عدت عليا لما مدت لها ايدي وقفت على كتفي

وقفت تغني وقعدنا نعمل مزيكا سوا

كل العيال تحت اتجمعوا يسمعوا البلياتشو اللي كلامه مزيكا

والعصفورة اللي كل ما تغني يتغير لونها

والعيال تصقف

كل حاجة كانت جميلة وملونة

كل الاطفال فجأة طلعتلهم عصيان خشب طويلة ف رجليهم

وظهروا عصافير كتير ملونين

كل عصفور معاه طرطور صغير

كل عصفور يروح لكل طفل ويحط فوق دماغه طرور

..وفجأة بقى كل الناس والاطفال ما بيتكلموش .. كل ما حد يحاول يتكلم يلاقي نفسه بيزمر او يصفر او صوته يطلع طبل وزمامير واحيانا صاجات

فضلنا كلنا فنص السما بنتكلم مزيكا

فجأة كل العصيان وقعت من رجلينا وكل عصفورة شالت بمنقارها حد مننا

وطارت

السما منورة جدا

والشمس دافية

والدنيا مزيكا

العصافير سابتنا وفضلنا طايرين