جزيرة القصب

طول الوقت كانت فاكرة كل حاجة بالتفصيل

كنا نتلم حواليها ونقعد نسمع من اول حواديت دكانة عبده حباله الخردوات لحد الست بريزة العجوزة اللي ساكنة ف فيلا لوحدها في اخر الشارع

بس النهردة ولما بلبل ابن عم زكي خبط على بابنا وفايده كبايتين قصب وقالنا دي حلاوة المحل الجديد وانهم اشتروا دكان عبده حباله وقلبوه محل عصير

خدنا الكبايات ودخلنا نقعد جمبها زي كل يوم من سنة نعمل دوشة.. وهي تسكت..

من يوم ما مشي وبطلت احكي مكنتش عارفة ازاي هحكيلهم حكاياتنا سوا وهو مش موجود

ازاي احكيلهم عن جدهم وهو ميكملش من بعدي الحكاية

وهو انا هعرف احكي لوحدي

ومين هيفكرني بالكلام

مين هيفكرني بوقفتنا كل يوم بكبايات القصب ف ادينا قدام الترام وكل حد فينا باصص ف اتجاه ومتراهنين عن الترام اللي هتيجي الاول واول ما نسمع صوت ترام من بعيد جدا كل حد بسرعة يبص عكس ناحيته فوشوشنا تتقابل ونضحك

نجري نحط الكبايات على رف عم قصبة وننط ف الترام اللي تيجي وعم عبده حبالة يطل علينا من شباك دكانه الصغير ويزعقلنا بصوته العالي " سكتكوا خضراا ""

مين هيقلدلهم صوته غيرك ؟

..

مع الوقت نسيت الحكايات والحوادبت بعدها نسيت الكلام والحروف

كل يوم نرجس تيجي جمبي وتتحايل عليا " والببي يا ماما قولي حاجة طب حتى اضحكي " كنت بغلب.. وتصعب عليا بس انا نسيت الاكام كان بيطلع ازاي ؟

من يوم ما مشيت وانا مابقتش اعرف اكون جمل لوحدي

نسيت الحروف الكلام والحكاوي

بس النهردة واول ما قعدوا حواليا ولمحت شكل الكبايات الازاز الكبيرة اللي كنت بتقولي دي كرستالة من جزيرة قصب ف نص البحر

مع كل رفعة لايدهم وهم بيشربوا وانا مبحلقة ..

بقالها كتير ما دقتش طعم مسكر علشان قلبها بس بحلقة عنيها النهردة ع الكبايات خليتنا ندوقها

.. ومع كل مرة كانت بتشرب ضحكتها كانت بتزيد وتوسع

ونسمع همهات صوت كلام او غناوي او دندنة

وتضحك

,ونسقيها تاني

وتشاور كمان ..

مع كل شفطة قصب كنت بشربها كنت بسمع حسك واشوفك

وافتكر لحد ما لقيتني على جزيرة القصب وسط الكريستالات ف نص البحر

وسمعت كل صوت سمعته زمان وقدرت افتكر كل الحكايات بتفاصيلها و صوت ضحكتك وياها صوت ضحكتي

كأن القصب فيه سر طعم الذاكرة

...

يومها عم عبده خد على خاطره جدا مننا كان متعشم اننا اكتر ناس هتزعل على دكانته كان فاكرنا مش هنهوب ناحية محل العصير الجديد من بعده ومن بعد عم قصبه

لكنه طل علينا من بلكونته الخشب ولقانا واخدين تيتة وقاعدين جمبها ع الترام وحوالينا كبايات قصب فاضية شافها وهي بتشاورله سمع ضحكتها وهي بتركب الترام لوحدها بشويش